Shumica e zyrtarëve të Degës së PDK-së në Malishevë të premten kanë hezituar t’i komentojnë publikisht bisedat telefonike të krerëve të kësaj partie që u bënë  publike një ditë më parë, por kishte edhe nga ta që nuk fshehën dëshpërimin nga ajo që kishin dëgjuar me veshët e tyre. Kryesuesi i KK të Malishevës dhe njëherësh anëtar i Kryesisë së Degës së PDK-së, Ragip Begaj është shprehur i indinjuar dhe i fyer nga përmbajtja e bisedave telefonike të transmetuara tashmë në media mes kryeministrit Hashim Thaçi, Adem Grabovcit, Sami Lushtakut e zyrtarëve të tjerë të PDK-së. "Malisheva i ka 14 mijë anëtarë të PDK-së, pjesa dërmuese e të cilëve janë familjarë të dëshmorëve, invalidë të luftës dhe veteranë të luftës së lavdishme të UÇK-së”, ka përkujtuar ai.