Kur i shkruante raportet e kishte kodin "Seiko”. Por atë natë ishte marrë në fshatin e tij për të kryer një punë tjetër. Në Prishtinë, përpara Hotel Victoria, makina e tyre ishte ndalë dhe njëri nga bashkëpunëtorët kishte marrë "shkorpionin me zhurmues” nga një xhip në të cilin dëshmitari kishte parë Azem Sylën. "Seiko” vrau Ibush Kllokoqin me të përpara shtëpisë së vet me pesë plumba. E kishte hedhur revolen aty afër dhe me bashkëpunëtorët kishte shkuar në drekë për dy orë të tëra, tek Qafa në Prishtinë. Në Gjykatën e Qarkut në Prishtinë të premten vazhdoi gjykimi i rastit Bllaca II me të pandehurit dhe mbrojtësit e tyre që ishin të pranishëm në seancë, por me mungesën e prokurorit special Maurizio Salustro i cili zëvendësohej nga prokurorja speciale Emma Riccato. Kolegji i shpalli si prova të pranueshme dëshmitë e Nazim Bllacës.
Kryetari i kolegjit pyeti mbrojtësin e Fahredin Gashit nëse gjendja e Fahredinit ishte më e mirë. Avokati Tahir Rrecaj propozoi që kolegji të vendosë për këtë çështje. "Sot në mëngjes e pyeta nëse e dinte se çfarë kishte ndodhur dje gjatë seancës, ai (Fahredin Gashi) mu përgjigj se nuk e dinte”.
Kryetari i kolegjit e pyeti Gashin nëse po e dëgjonte dhe nëse e dinte se kush ishte, por Fahredin Gashi nuk reagonte fare. Avokati Rrecaj ia përcolli atë që po pyeste kryetari i kolegjit. Reagimi i Farehdin Gashit ishte me "ngritjen e krahëve”.
Kolegji pasi u këshillua mori vendim që të vazhdohet me procedimin e dëshmitarit bashkëpunues Nazim Bllaca, kjo pasi që i pandehuri Fahredin Gashi ishte në gjendje që të përcillte gjykimin.
Pranohen dëshmitë e Bllacës
Kryetari i kolegjit njoftoi palët edhe me vendimin që kishte marrë kolegji lidhur me dëshmitë e Nazim Bllacës të dhëna në prokurori dhe polici. Vendimi i kolegjit ishte se të gjitha dëshmitë e dhëna nga Nazim Bllaca në prokurori dhe polici shpallen prova të pranueshme për kolegjin dhe janë pjesë e lëndës.
Pas vendimit në seancë u ftua dëshmitari bashkëpunues Nazim Bllaca. Ai erdhi nën përcjelljen e forcave të shumta të policisë së EULEX’it.
Bllaca dëshminë e tij e filloi me tregimin për 10 tetorin 1998, kur edhe ishte plagosur në një aksion që ai dhe batalioni i tij kishte ndërmarrë.
Më 1 mars 1999, Bllaca ishte caktuar si kontrollues i pikave të UCK-së. E meqë i njihte njerëzit që punonin në këtë sektor, këta persona i kishte njohur pas plagosjes së tij, e si rezultat i angazhimeve të tij ai ishte kyçur në ZKZ (Zbulim Kundër Zbulim), organ i UÇK’së.
"Detyrat që kisha në këtë njësit ishin përpilimi i raporteve lidhur me stafin civil dhe ushtarak. Kemi përshkruar biografi të personave të ndryshëm që hynin në zonën e UÇK’së. E me raste neve edhe përpilonim edhe raporte për ushtarë”, tha Bllaca.
"Unë raportoja, në lidhje me këtë sektor, në këtë kanal, Nazim Bllaca te Fahredin Gashi, e ky tek Naser Krasniqit me nofkën Bashkim Fino,...me këta takohesha fizikisht”, shtoi Bllaca.
Mbrojtja kundërshtonte gati çdo pyetje që shtronte prokurorja, por që kryetari i kolegjit i refuzoi të gjitha kundërshtimet, kjo pasi që shumica nga to ishin pa ndonjë bazë.
"Seiko” në SHIK
Nazim Bllaca vazhdoi tregimin e tij për aktivitetet e ZKZ-së dhe pas periudhës 15 qershor 1999. "Më 15 qershor 1999 verbalisht më është komunikuar se jam pjesëtar i Ministrisë së Mbrojtjes si pjesë e Qeverisë së Përkohshme”, tha Bllaca.
Në fund të qershorit Nazim Bllaca ishte takuar me disa njerëz të afërm të Kadri Veselit, ish-shefit të Shërbimit Informativ të Kosovës (SHIK). Këtë takim të parë e kishte organizuar Ekrem Jashari. Sipas Bllacës deri tek takimi kishte ardhur përmes shokut të tij Bekim Bytyqi. "Me Ekrem Jasharin kemi biseduar për sistemimin tim në ShIK”.
Bllaca sqaroi se kush ishte Ekrem Jashari "Ai ishte personi i para dhe pas luftës i cili ka një peshë dhe është i afërt me figurat më të mëdha”.
Punën në ShIK, Bllaca e kishte filluar me 20 qershor të 1999’së, ku pos Fahredin Gashit aty e kishte njoftuar edhe Shpresim Ukën.
Prokurorja e pyeti edhe për ShIK-un dhe aktivitetet që kishte kjo organizatë. "ShIK kishte qenë në kohën e luftës G2-shi me në krye Kadri Veselin, i cili ishte krijuar 12 nëntor 1998 si drejtori e veçantë...kjo drejtori me staf kaluan në ShIK”, tha Bllaca.
Bllaca shtoi se "sipas meje veprimtaritë e ShIK-ut kanë qenë 1) Kërcënimi; 2) Rrahje dhe 3) Vrasje”. "Ata kishin një strategji dhe punonin sipas saj, strategjia e ShIK-ut ishte eliminimi i kundërshtarëve politikë, eliminimi i kolaboracionistëve si dhe ngulfatja dhe kërcënimi i dëshmitarëve të Hagës”, shtoi Bllaca.
Bllaca tregoi edhe për zinxhirin komandues që kishte, duke thënë së "Unë Nazim Bllaca, te Fahredin Gashi, ai te Shpresim Uka, e ai në fund te Azem Syla”.
Nazim Bllaca tregoi kodin e tij që përdorte kur shkruante raporte për ShIK-un. Kodin e kishte ‘Seiko’.
Bllaca tregoi se grupi që ishin në sallë, me përjashtim të Driton Hajdarit, kishte kryer aksionin e parë kundër Sefer Sylës. Këto fjalë ngritën në këmbë Shaban Sylën duke kundërshtuar se dëshmitari po gënjen pasi që ai ishte axha i tij.
Kur prokurorja kërkoi që Bllaca të identifikojë të gjithë të pandehurit, Bllaca u kthye nga të pandehurit dhe pa secilin duke ia përmendur emrat e shkurtë dhe duke ju buzëqeshur.
Për të gjitha aktivitetet e muajit të parë në ShIK, Bllaca ishte paguar 130 ose 150 marka gjermane, ndërsa rrogën e parë në shtëpinë e tij e kishte dërguar Fahredin Gashi.
Aktivitetin e tij si pjesëtar i ShIK-ut e kishte përfunduar në vitin 2003, kurse rrogën e fundit e kishte marrë në fund të 2002. "Nuk ishte diçka e jashtëzakonshme që dola nga ShIK-u, nuk është se ata ndaluan aktivitetin”, tha Bllaca.
Nazim Bllaca u kujtoi të gjithëve se si në mënyrë direkte kishte marrë pjesë në vrasjen e Salih Gashit, për të cilën vrasje Fahredin Gashi është i dënuar nga Gjykata e Qarkut në Prishtinë me 18 vjet burgim.
Vrasjet vazhduan me Adem Lahun, në të cilën vrasje Bllaca nuk kishte qenë vet fizikisht por që kishte dijeni. Vrasja e tretë ishte ajo e Ibush Kollokoqit, e cila sipas Bllacës është kryer me datën 6 gusht 1999. Pastaj tentimvrasja e Ismet Afifit në nëntor të 1999 dhe tentim vrasja e Adem Salihajt në qershor 2000.
Vrasja e Ibush Kllokoqit
Bllaca filloi rrëfimin e vrasjes së Ibush Kllokoqit, duke treguar se "në gushtin e ’99 ne ishim shumë aktivë e kishim hapur disa fronte”. Kryetari i kolegjit pyeti "Kush ishit ju”. Nazim Bllaca tha se "Jemi grupi që gjendemi këtu - ‘të akuzuarit’”.
Fahredin Gashi e Sadik Abazi kishin shkuar me një xhip në Ribarin e Madh për të marrë Bllacën, atë natë vere. Më pas së bashku ishin nisur për në Prishtinë, por që Sadik Abazi kishte zbritur nga makina për të shkuar në makinën Opel Omega të cilën e ngiste Shpresim Uka.
Fahredini dhe Bllaca në Prishtinë kishin ndaluar në vendin ku tani është Hotel Victoria, dhe aty Fahredini kishte dalë nga xhipi për të shkuar në një xhip tjetër që ishte aty i parkuar. Nga xhipi tjetër Fahredini kishte sjellë një pistoletë shkorpion me zhurmëshues.
Nga ajo që kishte parë Bllaca në xhipin tjetër kishte qenë Azem Syla dhe shoferi i tij Arton Vila. Largësia në mes të xhipave nuk kishte qenë më shumë se 10 metra dhe koha kishte qenë afër errësirës për çka Nazim Bllaca thoshte se e kishte parë se kush kishte qenë në xhipin tjetër.
Më pas grupi ishte takuar tek disa banesa të bardha dhe aty u ishte ndarë Driton Hajdari, i cili e kishte marrë xhipin me vete dhe ishte larguar. Të tjerët kishin hipur në Opel Omega dhe ishin nisur në drejtim të shtëpisë së Ibush Kllokoqit. Paraprakisht Shpresim Uka e Fahredin Gashi kishin biseduar vetëm, por që bisedën nuk kishte arritur ta kuptonte Bllaca.
"Shpresim Uka tha ‘jemi duke shkuar tek një person që është i shkathtë, i shpejtë dhe se ky person sonte nuk duhet të na shpëtojë’. Unë i thash ‘nëse e shoh personin nuk besoj se do të shpëtojë’”, tregonte Bllaca për bisedën që kishin zhvilluar gjatë rrugës. Adresën e personit, sipas Bllacës, e dinin Fahredini dhe Shpresimi.
Kur ishin afruar tek shtëpia e Ibush Kllokoqit, Nazimi e kishte mbajtur shkorpionin në dorë, ndërsa taktika që kishin përdorur ishte futja e viktimës në trekëndësh. Me ta nuk kishte shkuar Shpresim Uka, i cili i kishte pritur me makinë tek vendi i caktuar.
"Në të djathtën time ishte Sadik Abazi, në të majtën time kisha Bekim Sylën ndërsa mbrapa ka qenë Fahredini” tregonte Bllaca pozicionet e marra para derës së Ibush Kllokoqit.
Pasi që Bllaca kishte trokitur në derën kryesore, një zë femre ishte lajmëruar dhe aty e kishte kërkuar Ibush Kllokoqin për disa pasaporta. "Me të dalë Ibushi, Sadik Abazi e pyeti se ‘si jeni a jeni mirë’ dhe është kthyer nga unë me fjalët ‘QEKY’”, dëshmon Bllaca.
"Unë pastaj shkrepa shkorpionin me zhurmëshues në drejtim të Ibush Kllokoqit, në stilin që të goditet në pjesën të mesme të trupit. Ky episod ndodhi shumë shpejtë dhe ne u tërhoqëm nga vendi i krimit”, shtoi Bllaca.
Bllaca mbante në mend se kishte shkrepur më shumë se 5 plumba dhe se në ikje e sipër kishte dëgjuar një zë gruaje. Pastaj në rrugë e sipër shkorpionin e kishte hedhur afër një gardhi dhe më pas ishin takuar tek makina.
Pas aksionit kishin shkuar tek restorant Qafa dhe kishin ngrënë darkë për 2 orë të tjera.
Pas më shumë se 5 ditësh Nazim Bllaca tregoi se kishte shkuar për ta marrë shkorpionin aty ku e kishte lënë dhe se me të kishte qenë Bekim Syla ndërsa me makinë ishte Shpresim Uka.
Tentimvrasja e Ismet Arifit
Për Ismet Arifin, Bllaca tregoi se kishte qenë në vëzhgim, përcjellje dhe monitorim të vazhdueshëm, si në banesën e tij në Bregun e Diellit ashtu edhe në shtëpinë në fshatin Bardhosh, ndërsa udhëzimet i kishte marrë nga Shpresim Uka.
"Qëllimi ishte që të nxirret Ismet Arifi gjallë nga banesa duke iu përmbajtur urdhrave të Shpresim Ukës. Ne disa herë jemi munduar që të bllokojmë veturën e tij por nuk ka pasur sukses...duke mos pasur sukses, me sugjerimin e Shpresim Ukës shkuam në banesën e tij”, rrëfente Bllaca veprimet që kishin ndërmarr në nëntor të 1999’së.
Në këtë aksion ishin të gjithë grupi. "Fahredini është caktuar të rrinte poshtë tek hyrja e banesës, unë dhe Shpresim Uka qëndruam në mes kateve 3 dhe 4, kurse Sadik Abazi, Driton Hajdari dhe Bekim Syla shkuan tek dera e Ismet Arifit”, dëshmoi Bllaca.
Sipas tij, nga pozita ku kishin qenë ishte e pamundur që të shihte derën e Arifit, por që pasi që kishte dëgjuar një zë femre dhe një diskutim të shkurtër ishin dëgjuar edhe të shtëna me armë dhe Bllaca me Shpresim Ukën ishin nisur për të dalë nga ndërtesa. Në katin e dytë i kishin pritur edhe të tjerët dhe së bashku kishin dalë nga banesa.
Me të dal në platonë e banesës kishte kuptuar se Driton Hajdari ishte plagosur afër belit në atë përballje dhe se kishte dëgjuar Fahredini të thoshte se ‘na duhet ndihma e Fatmir Xhelilit’.
"Ne kishim dy vetura, në njërën shkuan Shpresimi, Fahredini dhe Dritoni për në spital, kurse ne hipëm në xhip, ku Bekimi u ndal në Prishtinë ndërsa Sadik Abazi më dërgoi në Ribarin e Madh” tregoi Bllaca.
Bllaca shtoi se "Fahredin Gashi, Shpresim Uka, Fatmir Xhelili dhe Azem Syla, e dinë se si e tërhoqën dhe si ja dhanë statusin e invalidit të luftës Driton Hajdarit”.
Seanca e radhës është caktuar me 25 prill, ku Bllaca do të vazhdojë dhënien e dëshmisë së tij.
Te nderuar komentues! Duke mos dashur te cenojme opinionet tuaja, lutemi qe ato te mos permbajne fyerje dhe ofendime personale dhe te kene lidhje me shkrimin, apo temen per te cilen komentohet. Ne te kundert, nuk do te publikohen. Ju falenderojme qe na ndiqni dhe ju ftojme te vazhdoni te jeni pjese e Ks-Dardania. comments powered by Disqus
Kur i shkruante raportet e kishte kodin "Seiko”. Por atë natë ishte marrë në fshatin e tij për të kryer një punë tjetër. Në Prishtinë, përpara Hotel Victoria, makina e tyre ishte ndalë dhe njëri nga bashkëpunëtorët kishte marrë "shkorpionin me zhurmues” nga një xhip në të cilin dëshmitari kishte parë Azem Sylën. "Seiko” vrau Ibush Kllokoqin me të përpara shtëpisë së vet me pesë plumba. E kishte hedhur revolen aty afër dhe me bashkëpunëtorët kishte shkuar në drekë për dy orë të tëra, tek Qafa në Prishtinë.