Kreu i gjykatës që ka çuar në dorëheqjen e dy presidentëve të Kosovës brenda një viti ka sfiduar klasën politike, tek ka folur për njërën nga çështjet që ka hapur debat së fundi – definimi kushtetues i marrëveshjeve Kosovë-Serbi, të arritura në Bruksel. Enver Hasani ka premtuar të japë përgjigje nëse ato janë traktate ndërkombëtare ose jo.Në një intervistë dhënë "Kohës Ditore”, Hasani, që është edhe profesor i së drejtës ndërkombëtare, këto konkluzione i ka kualifikuar si puro politike.Zyrtarë të Qeverisë asnjëherë nuk i kanë quajtur të tilla, nga frika se, nëse definohen kësisoj, atëherë është obligim kushtetues që për ratifikim të qiten në Kuvend. Ratifikimi kërkon votën e së paku dy të tretave të deputetëve, ndërsa marrëveshjet nuk mbështeten nga opozita dhe nga një pjesë e deputetëve të subjekteve politike në pushtet.Hasani, në këtë intervistë, nuk është deklaruar nëse këto marrëveshje politike përmbushin kriterin për t’u quajtur traktate ndërkombëtare. Ka thënë se as në kërkesën e "Vetëvendosjes”, së cilës i është dhënë përgjigje në fillim të javës, nuk janë deklaruar për këtë. Kjo, ngaqë, sipas tij, "Vetëvendosja” kërkonte krejt diçka tjetër, e që nuk binte në juridiksionin e Gjykatës Kushtetuese.Edhe një dilemë ka lënë të hapur ai, në pjesën e parë të intervistës, që do të publikohet në dy vazhdime – nuk ka treguar nëse një qeveri që mund ta pasojë këtë të tashmen obligohet t’i implementojë konkluzionet ose jo. Sipas tij, kjo varet nga raporti i forcave politike në Kosovë, në Evropë dhe më gjerë.